- 17 Oct 2016

Sot, në Drejtorinë e Inspekcionit u prezantua sistemi i ri digjital i punës, i cili përfshinë regjistrimin e lajmërimeve; identifikimin e rasteve; procedimin e rasteve sipas rrjedhës; si dhe mbylljen apo dërgimin në një instancë tjetër.
Kjo mënyrë e punës do ta rritë dukshëm efikasitetin në Drejtorinë e Inspekcionit, edhe për shkak të shpejtësisë së veprimit në terren, edhe për shkak të shpejtësisë së procedimit të rasteve dhe marrjes së vendimeve. Inspektorët nga terreni sa herë që hasin në parregullësi komunikojnë direkt me Sallën Operative, ku e dërgojnë informacionin e nevojshëm. Ai informacion përpunohet tutje nga zyrtari përkatës, dhe në fund mbyllet si rast ose dërgohet në instanca të tjera. Inspektorit në terren i kthehet forma e shkruar e procesverbalit apo vendimit, të cilin e printon dhe ia jep palës në vendngjarje. I gjithë procesi digjitalizohet dhe arkivohet.
Brenda këtij sistemi, informacioni do të bartet përmes disa kanaleve, siç janë: vetë inspektori ose zyrtari përkatës; qendra e thirrjeve ku qytetarët mund të thërrasin pa pagese (0800-1-22-33; 0800-1-22-44); e-maili; si dhe rrjetet sociale. Aktualisht është duke u punuar për shtimin e një kanali të ri prej të cilit qytetari përmes një aplikacioni do ta bartë direkt informacionin brenda këtij sistemi. Kjo do ta bëjë qytetarin e Prishtinës pjesëmarrës aktiv në evidentimin dhe lajmërimin e shkeljeve eventuale.
Komuna e Prishtinës falënderon inxhinierin Fatban Bunjaku dhe grupin e programerëve që i udhëhoqi ai, të cilët me punën e tyre vullnetare të palodhshme bënë që të realizohet ky projekt pa kosto në të mirë të qytetarëve të Prishtinës.