- 02 Feb 2024

Në një atmosferë të ngrohtë dhe miqësore, Kryetari i Kryeqytetit Prishtina, z. Perparim Rama, priti sot në takim z. Bela Bozsik, Ambasadorin e Hungarisë në Kosovë.

Takimi u zhvillua në Odën e Kryeqytetit, ku u diskutuan çështje të ndryshme që lidhen me kulturën, sportin, mjedisin dhe zhvillimin urban. Të dyja palët shprehën vullnetin e tyre për të thelluar bashkëpunimin në fusha të ndryshme, duke përfshirë edukimin dhe teknologjinë.

Kryetari Rama shprehu mirënjohjen e tij për mbështetjen e vazhdueshme që Hungaria ka dhënë për Kosovën në arenën ndërkombëtare dhe vuri në dukje rëndësinë e këtij takimi si një dritare e re mundësish për të dyja vendet.

Ambasadori Bozsik vlerësoi lartë mikpritjen e Kryetarit Rama dhe pohoi se Hungaria është e përkushtuar të vazhdojë dhe zgjerojë bashkëpunimin me Prishtinën dhe më gjerë. Ai shtoi se ky takim simbolizon frymën e miqësisë dhe partneritetit që ekziston mes dy popujve dhe shteteve të tyre.

Takimi u mbyll me shkëmbimin e dhuratave simbolike që pasqyrojnë kulturat dhe traditat e secilit vend, si dhe me premtime për të vazhduar dialogun dhe projektet e përbashkëta në të ardhmen.