Drejtoria e Shëndetësisë dhe Qendra Kryesore e Mjekësisë Familjare (QKMF) fillojnë fushatën “Zbulimi i hershëm-Mbijetesë”

- 30 Sep 2020

Tetori është Muaji Ndërkombëtar i Luftës Kundër Kancerit të Gjirit dhe Drejtoria e Shëndetësisë e Qendra Kryesore e Mjekësisë Familjare (QKMF) po e fillojnë fushatën “Zbulimi i hershëm-Mbijetesë”.
Përgjatë muajit tetor, në njësinë e Radiologjisë në QKMF, shërbimet e mamografisë do të ofrohen pa pagesë për të gjitha gratë e Komunës së Prishtinës.
Mamografia është një metodë e përshtatshme për zbulimin e hershëm të kancerit të gjirit. Në një mamografi bëhen të dukshme edhe tumoret më të vegjël shumë më parë se të jenë të ndjeshëm me të prekur ose të njihen nga simptomat e tjera.
Mesatarisht, 1 nga 8 gra diagnostikohen gjatë jetës me kancer të gjirit. Mbi moshën 50 vjeç, rastet janë më të shpeshta, prandaj, mbrojtja më e mirë është zbulimi i hershëm.
Ftojmë të gjitha gratë që të vizitojnë Qendrën Kryesore të Mjekësisë Familjare për kontrolla rutinore dhe të informohen sa më mirë për këtë sëmundje dhe rëndësinë e zbulimit të hershëm të saj.
Zbulimi i hershëm shpëton jetë!