- 26 Mar 2024

Në një atmosferë plot përkushtim dhe solidaritet, Kryetari i Kryeqytetit, Përparim Rama, ka organizuar një iftar për imamët e Prishtinës për nder të muajit të Ramazanit. Në iftarin e shtruar nga kryetari Rama u bashkuan figura të shquara fetare për të ndarë momentet e shenjta të iftarit dhe për të reflektuar rreth vlerave të Ramazanit.

Në fjalën e tij, Kryetari Rama theksoi rëndësinë e këtij muaji si kohë për reflektim dhe vlerësim të thellë të vlerave jetësore. Ai tha: "Iftari që patëm sonte me imamët e kryeqytetit, ishte një përkujtues i asaj që Ramazani na sjell, duke qenë kohë për reflektim dhe mundësi për t’i çmuar gjërat vërtet me vlerë në jetë. Agjërimi na mundëson të ndalemi e të vlerësojmë të mirat që kemi, si dhe të ndajmë iftare të veçanta me familjarë e miq. Gjatë këtij Ramazani, le ta ruajmë shpirtin e përbashkësisë duke ua shtrirë dorën nevojtarëve dhe duke i forcuar lidhjet mes nesh, që Prishtinën e bëjnë vend kaq të veçantë."

Ky event u shënua si një moment i rëndësishëm në forcimin e lidhjeve ndërmjet institucioneve fetare dhe atyre qeverisëse, duke dëshmuar përkushtimin e Kryeqytetit për të ndërtuar një shoqëri më të bashkuar dhe inkluzive. Kryetari Rama falënderoi të pranishmit për pjesëmarrjen e tyre dhe shprehu dëshirën për vazhdimësinë e këtyre takimeve që nxisin dialogun dhe mirëkuptimin ndërmjet njerëzve.